Sant’Anniria di li sarmitaneddi

Un tributo al Siciliano, la mia madrelingua che mai rinnegherò.      

 

 

Sant’Anniria di li sarmitaneddi

 

Scurau e ‘nto paisi addummisciutu

nun si viri cchiù ‘na musca iri filiari,

pari propriu ‘u disertu, un munnu mortu.

 

” Socch’è, ora, ‘stu scrusciu ‘nta li strati ? “

” Va pisca ! Chi nni sacciu ? “

‘Nta ‘na mentri fannu verra e focu

picciriddi e picciutteddi.

 

” Veru ! Oggi è Sant’Anniria “

” Semu già a lu trenta di novembri ? “

” Ma, pi ‘stu santu, si fa ancora tutta ‘sta battaria ? “

“Nuddu ‘cchiu, a Salemi, pensa a tia ?”

 

Si canuscinu sulu li sordi

e si scordanu li santi.

 

Eppuru, ci sunnu ancora e pi furtuna

chiddi chi sannu e ripensanu,

ci sunnu chiddi chi ripigghianu cu cori

usanzi vecchi di li patri e

di lì so nanni,

e fa piaciri viriri priari

li nichi ‘nta ‘stu jornu.

 

Puru ‘st’annu, anchi si chiovi, sceru

‘ddi arzuneddi agguriusi

chi ‘ntronanu la testa a li cristiani

tutt’attangati nni li so casi.

 

Cu grida, strallasciu e ‘nguestu ranni

vannu tirannu cu forza, a strascinuni,

caddi sfunnati, fitinzii e lanni.

 

” Unni sunnu ? “

” S’inni jeru ? “

” Eccu, talia ‘dda…talia ! “

 

Di ‘na cantunera iddi spuntaru.

Trippiannu comu li foddi,

vannu accussì vuciannu

e macari finu a notti funna

vulissiru cunnuciri ‘stu ‘nfernu.

 

E prosita a ‘sti nicareddi sarmitani

chi pensanu a ‘stu jornu cu tantu amuri.

Iddi sturdinu, accussì, l’aricchi di li genti

chi mancu sannu ‘cchiu nenti.

E chisti, sintennuli, poi dicinu cu stupuri :

 

” Talè, talè ! Chi bella babbilonia !

Mizzica, si senti jusu e susu.

‘Ddi pezzi di macabunni,

stasira, fannu festa ranni

pi lu santuzzu nostru baccanusu “

 

Salemi, 1 dicembre 1993

©copyright Gioacchino Di Bella

 

%d blogger hanno fatto clic su Mi Piace per questo: